Bollywood actor Akshay Kumar aur Bhumi Pednekar ek baar phir se bade parde par sath aane ke liye taiyar hain. Hal hi me aayi ek report ke mutabiq, mashhoor filmmaker Priyadarshan ne apni agli film ke liye Bhumi Pednekar ko lead role me cast kiye jaane ki pushti kar di hai.
Priyadarshan ki agli comedy-thriller film
Hindustan Times ko diye gaye interview me director Priyadarshan ne bataya ki unki is aane wali film me Bhumi Pednekar female lead hongi. Kai reports ke anusaar, yeh ek comedy-thriller film hai jo 1970 ke background par banayi ja rahi hai. Is film me actor Rajpal Yadav bhi ek mukhya bhumika me nazar aayenge.
November ke aakhir me shuru hogi shooting
Report ke mutabiq, Priyadarshan ki yeh film November mahine ke aakhiri hafte me floors par aa sakti hai. Is project ki shooting lagbhag teen mahine tak chalegi, jise zyadatar Rajasthan, Mumbai aur Bhopal me shoot kiya jayega.
Pehle bhi sath kar chuke hain kaam
Bhumi Pednekar aur Akshay Kumar isse pehle film 'Toilet: Ek Prem Katha' aur 'Raksha Bandhan' me ek sath kaam kar chuke hain. 2017 ki film box office par superhit rahi thi, jabki 2022 ki family film ko audience aur critics se mila-jula response mila tha.
Akshay aur Priyadarshan ki nouvi film
Akshay Kumar aur Priyadarshan ki jodi ek baar phir sath kaam kar rahi hai. Dono ne isse pehle 'Hera Pheri', 'Garam Masala', 'Bhagam Bhag', 'Bhool Bhulaiyaa', 'De Dana Dan', 'Khatta Meetha', aur 'Bhooth Bangla' jaisi kai hit filmo me sath kaam kiya hai.